11/2/2021
____________
قصيدة ( الغربه )
بقلم الشاعر المصري
د.أحمد إبراهيم النجار
______________
برغم البعد والمسافات
في وسط الغربه بكتبلك
وكيف حالك وكيف لولاد
_______________
صعيبه الغربه يا بهيه
على اكتافي
على اكتافي وحمل وزاد
_______________
اقولك ايه حياه صعبه
وغربه وليل
كفيل واخد من الريالات
ومن قُوتي
_______________
وصابر ع الجراح بسكات
اقولك ايه ؟
ولا ايه ولا ايه ؟
______________
ساعات واقف
على رجلّي
في وسط الشمس
______________
تحرقنى ومحنّي الراس
كمان ضهرّي
عشان لولاد
مقولتش اه ولا قايل
______________
ولا راح اقول
وصابر لجل ما تشكوا
ولا تبكوا
______________
فى يوم م الجوع
سنين في الغربه متغرّب
عشان البيت
عشان امايه ما تحتاج
______________
فلوس لعلاج
عشانك انتي يا بهيه
وعشان لولاد
______________
ووقت صعيب
كتير عايشين
مرار واهات
_______________
وااااه يا بهيه م الأيام
ولا بتمرق ولا بتفوت
وااااه يا بهيه من جرحي
_______________
سجين ف سُكات
ومتغرب مع شمسي
ومتقيُد معاه الصوت
وينزل دمعى من عيني
_______________
امانه قولى لمّايه
قوليلها ياما تدعيلى
وما تبكيش واهى أيام
وهتعدي وتشرق شمس
_______________
ويرحل ليل ويرجع طير
جريح مشتاق
ويرحل ظلم م الأبواب
_______________
وارجع تاني يا بهيه
لعنيكي السود
يا وحشانى
كتير وببات اعيش أحلم
________________
بشجر التوت قصاد الدار
وصوت عصافير
وبتزقزق على الأغصان
________________
وصوت لولاد هنا ريحي
وصوت امايه وصوتك
وصوت الساقيه الدايرة
________________
قصاد الدار
وانا قاعد في وسط خضار وبشرب شاي صعيدي ملايح وشعله م الحطب والع
على ابريق في وسط النار
________________
واااااه يا بهيه من حلمى
وده حلم بسيط
لا عايز طين وعلى عزبة
ولا حابب اعيش غربه
________________
وخايف فجأة في بعدك ماشوف لولاد ولا شوفك ولا امُايه ويخطفنى ملاك الموت
________________
بقلم الشاعر المصري
د.احمد إبراهيم النجار
ليست هناك تعليقات:
إرسال تعليق