** مدرستي **
[ بالعامّيّة التوّنسيّة ]
مدرستي لحنينة زرت
بحت بأشواقي و احترت
و احتارت هي و قالت لي
في لحظة كيفاش كبرت
***
وينو صغرك وين ايّامك
ضحكاتك لعبك و احلامك
تتبسّم تعثر في كلامك
و تدمع لو مرّة تأثّرت
***
تتذكّر في القسم صحابك
أقلام الزّينة و كتابك
سؤال آنستي و جوابك
و السّاحة اللّي فيها سرت
***
تتذكّرشي وقت اللّمجة
أيّام الفرحة و البهجة
و لمّا تقرا درجة بدرجة
دروسك اللّي عليها سهرت
***
قلت لمدرستي في وجودك
بوسة على جبينك و خدودك
انت أمّي و احنا جنودك
و انا صغيرك مهما كبرت
***
** محمّد الزّواري ـ تونس **
ليست هناك تعليقات:
إرسال تعليق