وبعدين ياقلبي
مش هتبطل دق
هي بتبعد لا وبتعند
وانت عمال بترق
هي سايقه عليك بدلال
كله بيرزق
الطير الطاير
حتي النمل الحاير جوه الشق
وبعدين ياقلبي
اتقل حبة
رق شوية
اقسي بس امانه
تبقي القسوة بحنية
وابعد مرة
واجري عليها المرة الجايه
عارفك طيب
لما تحب بتعشق جامد
كل حالاتك صاعبه ياقلبي
ديما شارد
اكمنك ديما علي الحامي
عمرك ماهتحس شعورك بارد
وبعدين ياقلبي
ينفع دائك بالحب ياقلبي
يبقي دواء
ينفع بعد الصبر نلاقي
فيها رجاء
صعب الحب بجد ياقلبي
لما تلاقي ترياق وجعك
جوه الداء
لما تحس
والاجمل انك تتحس
اول مرة اشوف معلول
بيحب الداء
اول مرة تغلبني ياقلبي
مرة من كتر الشوق
ومرة من كتر غياب
اول مرة تحس حاجات
وحاجات وحاجات
متعرفش ايه الأسباب
كل مشاعر عايش بيها
كلها ليها
تملي الف كتاب
لو سألتني بتحبها
احاول اخبي
تصرخ انت وتقول كداب
مقدرش أنكر
بحبها بنعيم الجنة
في الحضور والغياب
في الروقان والعذاب
احمدعبدالحق
ليست هناك تعليقات:
إرسال تعليق