••••••••••••••••• ( السلعوّة ) •••••••••••
مادبجته فى هذا الزجل " الحلمنتيشى " هو نوع من " الفكاهة " قصدت منه أن نسرى عن أنفسنا قليلا ولم أقصد شخصية بعينها ؛ رغم أننا من الممكن أن نكون قد صادفنا هذا النموذج وتعاملنا معه أو صادفنا شبيه بهذا النموذج ؛ ولكن على كل الأحوال لاتخرجون هذا الزجل عن نطاق " المداعبة " •
السلعوة
عمر العقل ماكان بالسِن
انا اعرف شنخور فظ يجن
شكله فظيع وعملّى حليوه
ونفسه يتدلع ويدن
مع قمرات أد عياله
ما اهو مسحور الأخ بِهن
وهنّ واخدينه أضحوكة
إكمن قفاه أملس بيرن
عامل نفسه صُغنّن نوغّه
وأعيل من عيل بيسن
واللى يشوفه يقول سلعوّة
وناس تانية تقولك جن
أصله نحيف أد الفتله
أما رأسه فتوزن طن
وعينه تملّى يبرق بيها
كأنه فار هربان من خُن
أما صفاته إخص عليها
أخينا لئيم جداً وسهون
غاوى يوقّع بين الناس
ماهو كيّاد بيكيد ويفن
كمان عيّاب والنية هباب
شوكة فى عينه جوه النن
مقضى كل حياته مشاكل
ما بيهداش أبداً ويكن
مش بيبطّل يوم إشاعات
ييجى ف ودن الناس ويزن
وبخيل جداً شوف من بخله
مراته بتصرخ فيه وتأن
تملّى لابس هِدمة قديمة
ناقصة تقوله ارحمنى وحن
ويوم مايتشبرق ويبحبح
يشرب قهوة من غير بُن
سلام مربع ليه من قلبى
تن تربن تربن تربن
~~~~~~~~~~~~~~
الروائي والشاعر
والمحرر الصحفى
ايمن عزالدين سكورى
من مدونتى
" صداح فى بلاد غريبة "
ليست هناك تعليقات:
إرسال تعليق