الْهَايْمَه
اَلْيُومْ يُومْ حْسَابْ ... بِينيِ وْ بِينِكْ
ياَ الْهاَيْمَه
يا شَارْدَهَ فِِي مْحَايْنِكْ ... وَ حْنِينِكْ
يَا الْواهْمَه
مَا فاَهْمَه
كَانِكْ عَلَى لَحْبَابْ ... اللِّي نَاسِينِكْ
مِتْضَايْمَه
شُڨِّي الْخْلاَ هِزِّي عْڨاَبْ ...سْنيِنِكْ
مِتْڨَاَسْمَه
وَنِّي وْ جِنيِّ وْ زَغْرْطِي ..فِي جْنُونِكْ
يا الواجمَه
ناَرْ بَارْدَه تَحْرِڨْ خْضَارْ ...كْنِينِكْ
مِتْضَارْمَه
******
هِزِّي الثّناياَ السُّودْ ... سُودْ وْزَرْهَا
مِتْعاَرْمَه
بَامْطَارْهَا وِ ثْلُوجْهَا ...وِ ڨْرِرْهَا
مِتْلاَطْمَه
باَصْڨَاعْهَا جْمَامِيدْها ...وِ حْجَرْهَا
مِتْرَاكْمَه
هْفاَهِيفْ وَحِْشِ الكَافْ ... تحت غْدَرْهَا
مِتْرَاوْمَه
بِبْرُوڨْهَا وِ سْحابْها ... وِ مْطَرْهَا
مِتْصَادْمَه
باَنْوَاوْهَا وِ بْسَخُوهَا ... فِي فْجَرْهَا
مِتْلاَيْمَه
عَ اوْجَاعْ صَبْرْ خْواطْرِكْ... فِي خْبَرْهَا
مِتْكَاتْمَه
******
شُڨِّي اللّْيَالِي الْكَالْحَه ...فِي صْرَدْهَا
و ِغْمَامْهَا
مْڨَاطِيعْ ظَلْمَه ثَاڨْلَه ... فِي غْمَدْهَا
وِ صْمَامْها
لاَ جَاوْبِتْ حِينْ مَا طْلبْتِ ... سْنَدْهَا
وِ كْلاَمْهَا
لاَ سَلّْمِتْ لاَ عَلّْمِتْ ... فِي وْعَدْهَا
وِ زْمَامْهاَ
وْ شُڨِّي لْياَلِي خْرِيفْ ...طَاحْ وْرَڨْهَا
عْلىَ دْوامْهَا
وْ لاَ تَسْهْلِي لاَشْ مَا الرّْبيعْ... لْحَڨْهَا
بِلْزَامْهَا ...
مْزَاهيرْ وِ نْوَاوِيرْ باَهِي ....عْبَڨْهاَ
وْ شَمَّامْهَا
******
وِ طْيُورْهَا مِزَّاوْجَه ... فِي عْشِڨْهَا
وَ انْغاَمْهَا
وَ اوْكَارْهاَ مَنْعِتْ عَلَى ... وَاثِڨْهَا
وْ زُدَّامْهَا
ڨاَلْ الرّْبِيعْ مَا لِيكْ عَنْدِي ...رَدْهَه
مْعَ حْمَامْهَا
هِزِّي خْريفْ عْلىَ شْتاكْ ...مْدَدْهَا
وَ ايَّامْهَا
وْ لا َتَطْمْعِي فِي خْضَارْهَا...و ُوْرَدْهَا
وَ انْعاَمْهَا
وْ صُدِّي عَلى ڨَايمْ ڨْيامْ ... عْدَدْهَا
عْلَى اوْهاَمْهَا ...
صُدِّي عَلى ڨَايمْ ڨْيامْ ... عْدَدْهَا
عْلَى اوْهاَمْهَا ...
زهرة .الحواشي
من حديث الروح *وشمات*
ليست هناك تعليقات:
إرسال تعليق