...... ستر وغطا.......
اخوك السند
في الشده والعكاز
وايد تشدك
وتفك في الالغاز
اخوك قوتك ودراعك
مهما يجور الزمن
لو حتى مين باعك
يستر عليك دنيتك
ويغطي اوجاعك
اخوك السقف والعمدان
وفي عز برد الشتا
ماينمش لو عريان
ويحس لون دمعتك
من غير ماحتي تبان
اخوك دا ستر وغطا
لو عدا ليل امشير
تحس فيه بالدفا
لو حتى كنت فقير
مش كل اخ اتخلق
هتلاقي عنده ضمير
الدنيا فيها كتير
الوان على أشكال
فيها اللي باع دنيته
فيها اللي صبره جبال
فيها اللي طار في الهوا
فيها اللي عاش خلخال
فيها اللي عاش بالطمع
فيها اللي طبعه عيال
يميل عليك ويكسرك
وتعده م الاندال
اخوك يميل الزمن
تلقاه سند في الحال
مش كل اخ اتولد
تلقاه ولد ويشتال
دا فيه عيال تتولد
ماتساوي نص ريال..........
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق