شني هديتك للي تحب يوم عيد الحب؟
قالولي عيد الحب قرب
ماتنساش تحضر هديتك للي تحب
دبوزة بارفان سينياي
و إلا صباط مضخم من أرقى بوتيك
تي حتى باكو شكلاطة سعيد
بمناسبة هذا العيد
موش مشكل
راجلك ناس ملاح وطيب
يرضى باللي من عندك يكتب
طول اليوم وهوما يسألو فيّ
م الصباح حتى للعشيّة
شنو حضرتلو من هدية
قتلهم
أنا في حياتو أغلى هدية
أنا موش كان مرتو و عزيزة قلبو
أنا الأم و الصاحبة و الأخت و البنية
و انا اللي م الصغر عليه متسمية
انا اللي يلقاني مادتلو ايدي في كل غصرة وكل بليّة
هو زادة موش كان راجلي و مولة بيتي
هو بابا و امي و أخوتي
و عمري اللي فات و اللي جاي و كل دنيتي
هو صاحبي و ابني و ممو عينيّ
اللي يفهمني من نظرة عينيّ
و يحس بوجيعتي و أحزاتي
من قبل ماتنطق شفايفي و لساني
و من قبل ما نحكي ع اللي متعّبني و يوجع فيّ
هو الحيط اللي وقت اللي مانلقى بحذاي حد
عليه نتكى و نتسند
وعمرو لا يشكي ولا يقول أح
مهما يتعب ويتّغلب
ومهما يثقل عليه الحمل
وهو اللي لدلالي و هبالي ديمة يحمل
وعليّ عمرو ما يميل و لا يبعد
لوكان الناس الكل عليّ تحيد تبعد
هو اللي عليّ عمرو ما يتغير و لا يتبدل
ونبقى في نظرو ديمةالأصغر و الأحلى و الأجمل
من غير لا نحمّرو لا نغبّر و لانكحّل
هو اللي منصبني على عرش قلبو اميرة
ويشاورني في الصغيرة و الكبيرة
و مايعمل خيط في إبرة
كان ما انا عليها نرضى
ونعطيه التأشيرة
هو اللي يبات ليلو يخمّم فيّ
ولا تحلالو دنيتو بلا بيّ
و هو اللي عدّى عمرو يدلّل فيّ
و يقطّر في الرضى من عينيّ
وبعد هذا الكل مازلتو تسألو فيّ على الهدية؟
و حسب رايكم اما هدية في هالدنيا
قادرة أنها تملالي عيني؟
وهو عندي أغلى هدية؟
نهلة دحمان الرقيق
ليست هناك تعليقات:
إرسال تعليق