مرشح وعاوز مني صوتي
يا أزمة عدي، يا أزمة فوتي
صوتي رايح لحد تاني
قابل شروطي، وأنا ف مكاني
ببعت رسالة لأخويا هاني
يا صاحبي قوله يبطل غلاسة
دنيتنا حلوة من غير طفاسة
سيادته جاي عاملي
فيها مرشح رياسة
مهما يداري وشه الحقيقي
باين عليه طبع الشراسة
تحس إنك في زمن العبيد
وسوق النخاسة
خلاني أحلم وأرسم أماني
وليمة جاهزة، محاشي وصواني
قاعد كأني سلطان زماني
والناس تعاني
طبلة وزفة، والبيه مشغل
كوكتيل أغاني
غمز بعينه، اديني صوتك
خسارة أفوتك
كلامه مقنع، لكن دماغي مريحاني
حكاية وهتخلص، خليني ساكت
ماسك لساني
يا بلادي انتي اللي مقويناي
ينفع أبيعك واسمح
لغيري يركب حصاني
لأجل الأمانة، في ناس شريفة
عايزة تخدم، قلوبها صافية
طاهرة وعفيفة
قولت عليهم ف بداية كلامي
أنا كنت واضح
صوتي رايح لحد تاني
//عبدالله النجار
ليست هناك تعليقات:
إرسال تعليق