!!،،ثقافة سوء الظن والتخوين،،!!
بقلمى : د/علوى القاضى.
... للأسف إحنا شعوب مختلفة فكرا وثقافة وفلسفة عن العالم كله ، ليه ؟!
... أقوللك : إللى يبيع حاجة رخيصة نقول عليها دى وحشة وأكيد فيها عيوب
... واللى يعامل ضميره وميستغلش الظروف نقول عليه دا بيغش
... واللى يعمل حاجة لله فى الظروف القاسية دى نقول دا بيعمل شو لمحله
... ليه بقى كل ده ؟!
... حدث أمامى صيدلي يبيع الكحول بسعر رخيص ومش عايز يستغل الظروف دى ، تصوروا اللى يدخل يشترى منه يسأله الأول على سعره لما يقولهم سعره يقولوا له إزاى ده رخيص يبقى مغشوش ، واضطر يعمل لهم تجربة علشان يعرفهم المغشوش من غيره ، بس إزاى إحنا شعب نحب اللى يستغلنا
... حتى أنا رديت عليه وقلتله الدكتور اللى كشفه بسيط يقولوا عليه مبيعرفش حاجة ، والتاجر اللى يبيع أرخص يقولوا حاجته وحشة ومركونة
... حتى اللى بيوزع فى محله ببلاش ويقول كله لله يقولوا ده شو علشان يعمل دعاية
... حتى لو فعلا دعاية هو أخد منك ولا من غيرك حاجة ، ولا اللى بياخد منه بيقولهم لازم تشتروا من المحل حاجة
... إيه ده !!
. . إمتى بقى هنعرف نتعامل صح ، ونبطل سوء الظن والتخوين عمال على بطال
... إيه ده !!
. . حتى وإحنا فى عز البلاء والغلاء مش مبطلين نخون بعض
... احبابنا نظفوا قلوبكم بقى واحسنوا الظن ببعض
... وفى مجال الطب الدكاترة لم يسلموا من سوء الظن والتخوين
... الدكتور اللي كشفه رخيص الناس تقول ما بيفهمش حاجه
... والدكتور اللي كشفه غالى الناس تقول معندوش رحمه
... والدكتور اللي مابيطولش في الكشف الناس تقول بيكروت
... والدكتور اللي بيطول في الكشف الناس تقول له إنجز
... والدكتور اللي بيكتب علاج رخيص الناس تقول دقة قديمة
... والدكتور اللي بيكتب علاج غالي الناس تقول مظبط مع الصيدلية
... والدكتور اللي عيادته مفيهاش أجهزة الناس تقول على أده
... والدكتور اللي عيادته فيها أجهزة كتير الناس تقول بيعمل شغل على المرضى
... والدكتور اللي مش مهتم بمظهره ولبسه الناس تقول عليه مدهول
... والدكتور اللي مهتم بمظهره ولبسه الناس تقول عليه تنك
... والدكتور اللي مش محضر دراسات عليا الناس تقول عليه حلاق صحة
... والدكتور اللى محضر دراسات عليا الناس تقول الطب مش بالشهادات
... والدكتور لو ضحك مع المريض يقولوا عليه دكتور مش رزين
... والدكتور لو كشر في وش المريض يقولوا عليه دكتور معقد
... مفيش حد عاجبكم إنتم عاوزين إيه بالضبط
... تحياتى ...
ليست هناك تعليقات:
إرسال تعليق