بلاش أنزحة
بقلمي / رمضان العلالقة
~~~~~~
بلاها أنزحة فاضية
نسيمك فاح من طينة
لإنك من عدم مخلوق
لسانك العويل يلطش
و مقدرتش تكون صابر
و عند الحق بتكابر
و ف الآخر
بتضايق
و مش طايق تكلم حد
فكون إنسان
تعدّل من عَطَبْ قولك
كلامك بالأدب إحسان
تلاقي من بيسمع لك
و يدعيلك تكون مستور
تطبطب ع الفقير واجب
و تسأل ع اليتيم ينصان
تموت الناس مغرورة
بحب المال
تعيب الحق و تماطل
و ف الباطل كما المُنشار
غرور النفس دوامة
و كيف هنغير الصورة ؟
و مين هيرمم الإخلاص ؟
فـ متكنشي أسير نفسك
على كتفك تشيل ف جبال
نَكِير قاعد و مستنى
على مفرق سُبل راسي
يقولك كنت بتصلي ؟
و فين راحت حقوق الناس ؟
و ردك يا عويل ناسي
و تصرخ لليتيم عِيدوا
و زيدوا للأجِير حقهُ
و مين ف الزنقة يسمعلك ؟
خلاص انفضت الشركة
وريثك قَسِّم التِركة
و من بكره عِرف حالهُ
ينام و انت على بالهُ
يكلم حد يزرع لك
يدوم الود عود صبّار
دا بس ظروف أشغالهُ
عشان وقتهُ يادوب ع القد
و متقُولشي ولَد غلطان
مهو برضه بيترحم على ذكرى
و من بكره يغني لك
صبرت سنين
و نار الوجد
فـ من فضلك
متزعلشي
و فيه غيرك من الاخيار
بيندب عُمر و الماضي
و يشكي حالة المشؤم
يدور و يلف ع الفاضي
و مالهُ بالحرام مختوم
بتنده ع اللي خد مالك ؟
نبيه انت واخد بالك
قريت العصر و التوبة ؟
خلاص الصفحة مقلوبة
ما فش أعذار
ولا وارث ولا موروث
فيا منحوس ليه تجري
و تتسابق
و تجمع ف الحرام بايدك
مدام الرزق مش عافية
و ربك ضامن الأرزاق
~~~~~~~~~~~
شعر / رمضان العلالقة
ليست هناك تعليقات:
إرسال تعليق