جفّت الثمرة في شجيرة
قطفوها من غير ملام
كسّر الظلم التّبسيمة
ذبلت الزّهرة يا ميمة
تكسّر الغصن م الأحزان
هذا سيدي وهذي جنينة
هذا فيض من إحساس
دمعت عيني يا لمّيمة
جرحو تلميذو وجرى
نزف العرق م الكتمان
هزّيت وردة ليك يا سيدي
نحبّ نداوي بيها جروحك
نلقى روحي بلا وردات
دمعت عيني يا ميمة
وقت لقيتو في الإسعاف
هذا سيدي وهذي وريدة
وطباشيرو على الألواح
حروفو ديما زهو جنينة
علّمنا نرفع الرّاس
دمعت عيني يا تبسيمة
لمّا ريت الدّم ألياف
شعلت ناري هذي مصيبة
الأستاذ فقد القيمة
من عند ناس بلا إحساس
وكان وجيعتو يا ميمة
هذا حالنا في الميزان
ربّي صغيرك ع التّرنيمة
وزيد وعّيه بالكلام
وردّ بالك عليه من الحيرة
ومن الدّلال يورّث الهبال
خاف عليه م الشّيطان
واللّي جرحك آه يا ويله
واللّي كتبو بالسكّينة
ساطور وغشّ وتبهذيلة
نزف الدّم يا لمّيمة
الجرح ما تداويه الأيّام
حميدة بن ساسي
ليست هناك تعليقات:
إرسال تعليق