مرسوم جدي
بقلمي رمضان العلالقة
~~~~~~~~~
ف أخر اليوم
و كل الأهل و العيلة
ف بيت جدي
و فيه مرسوم
بيكسر حِدة الطايح
و م المرحوم
فـ وسط العزوة و اللمّة
عيال بتعفر الشارع
و نسوان تقرا ف الطالع
و م الجامع رِجِع خالي
مع اعمامي
و كلهُ يمجد الغالي
مفارش أكل مدوها
بشيء بامية
و شيء محشي
و شيء لحمة
سعادتي خِبت ف الزحمة
و فـ الهيصة يقولوا
قَرب اتغدا
جوايا شيء بيتمرد
و متهدد
هجوم جبار
جيوش بتهاجم الكفار
يروح اللون و اتغير
و انا مخنوق و متكدر
حِلفت برحمتهُ ف سري
و من علّا ف مقدارك
و حطك جد م الأجداد
ما عد داخل عَتب دارك
ولا ف الزحمة هتغدا
و قال يعني بقيت راقي
أحب الميّة ف إزازة
و كاس فاضي
صحون تترص ع السفرة
يلف الشوكة منديلها
على فجأة
يهدّي لهجتي الجافة
علامة صوت محشورة
بتتعكز على الماضي
و م المماليك
أبص بعيد
ألاقي القُلّة بتنقط على الشباك
إزاز الدرفة مكسورة
و نص الشيش
تيار الهوى جارف
عَامِل زغاريت
و ع الحيطة
ٱشوف صورة و مركونة
بقالها سنين
بتتمرجح مع التيار
ساندها غُبار من الأيام
و من حظي عيون جدي
بتزغرلي
أقول يمكن دا مشتاقلي
أتاري ف بصتهُ ليا بيندهلي
و بيقولّي
ربايتك ياض على إيدي
ياواد إنت يادوب ليلة
تباتها ف دايرة الزحمة
مافيش رحمة ؟
نسيت الزرع طوالي ؟
نسيت القمح و الساقية ؟
نسيت المندرة الدافية
و إيه تاني ؟
م تخلع توبك الناصع
دا متخيط بخيط واسع
و لون فكرك
دا لون مسموم
و تلبس توبك العادي
و عيش راضي
على إنك تكون مقنوع
يدوب الجلد فوق جسمك
تموت م الجوع
خليك شَهم و ف حالك
و دي الفطرة
و هي الغربة بقيالك ؟
توديك كلمة و تجيبك ؟
أعيد تركيبك المخلوع ؟
ياواد إفهم و خد فكرة
صحيح مالك عَرق
من دمعة المطرة
فـ صون بيئتك
و دي بالذات
أُبر محقونة ف وريدك
~~~~~~~~~~~
بقلم / رمضان العلالقة
ليست هناك تعليقات:
إرسال تعليق