قصيدة
دموع فى الشوارع
ل أيمن البكرى
القصيده مش مكتوبه
علشان تأخد إعجابات وتعليقات
ولا علشان تفكرنى
كام شهيد ف بلدى مات
أنا مش أعمى ولا على عينى ضباب
محدش يقولى مش شايف الاءنجازات
شفت كل حاجه وسمعت كلامكم عن الاءعجازات
بس شفت أطفال بتأكل من الزباله ذى الكلاب
وشفت ناس عايشه ف عشش
والبرد مبيرحمش لا طفل صغير
ولا راجل عجوز شعروا شاب
وشفت ناس ممعاش تمن الفطار
وأب بيتحسر لما إبنوا شاور على حاجه
نفسوا فيها بس تمنها ميقدرش عليها
وناس مريضه ممعهاش تمن العلاج
مستنيه على قوائم الاءنتظار
وناس كتير مش هتقدر تعيش
دموع ف الشوارع
صوت نفسوا يلاقى نفسوا طالع
ويقول حرام كفايه غلاء أسعار
مفهمش أنا ف الحرب إل دايره
ولا إيه سببها ولا مين جلبها
ولا مين خسر ومين ضرب
ولا إيه السبب
أنا بس شايف بيوت كتيره هتتخرب
شايف وجع كل الناس الغلابه
ناس تعبانه بزياده مش ناقصه هموم
شيلوا من على عينكم الغيوم
وكفايه كلام عن إل فات
شبعنا كلام عن الاءنجازات
وشوفوا ناس من فقرها بتكمل عشاها نوم
القصيده مش مكتوبه
علشان تقولوا عليا خاين
وإنى مش شايف الحقيقه
وكل شئ واضح وباين
ولما أتكلم كمان
عن ناس بتحلم تلاقى الاءمان
والاءمان ب النسبالهم
إنهم يكونوا مستورين
يعنى لقمه وغطا وأربع حيطان
بعدها أى حاجه هتقولوها
هيقولوكم أمين
ويمكن ساعتها منلاقيش حد ضايع
ولا ناس بتبيع لحمها ذى البضايع
ولا شاب مدمن ولا شاب عاطل
ولا شاب صايع
ولا هنشوف دموع فى الشوارع
ليست هناك تعليقات:
إرسال تعليق