(جبر الخواطر)
جابر ومجبورة
ياجابر..يابو الجوابر
لية كسرت بخاطر مجبورة
دى كلمة حب منك
تعيش عليها مبهورة
هتبقى انت والزمن
دى عايشة العمر مقهورة
يامجبورة
ناديلة ومن الحنان اديلة
متقافيش لة على الواحدة وعديلة
واللى بيحبة اهديلة
وسامحية واوعى تعديلة
دة انتى حمامة ويمامة وعصفورة
لية التكشيرة يااميرة
عشية ومشية وعيشية
وغنيلة
تعيشى العمر مسرورة
ياجابر
دى شارياك ومشترياك
ومش بيعاك
مين فى تعبك غيرها رعاك
كنت اية وبقيت فين
دى هى فرحك ومرحك ودواك
دى مجبورة اللى كل العيون
عليها حسداك
بنت الاصول الغندورة
يامجبورة
لية الزعل والغم
فين خفة الدم
دى ايام العمر منظورة
ياجابر
دى هى الاصل والفصل والمدرسة
ليك خدامة ولعيالك مدرسة
فى الشدة راجل
لوعاشت فى نار جنب المراجل
راسية وعاقلة
مش زى الحريم المهوسة
ياجبرك وجوابرك
لما تتجبر على حبيبةالقلب الصبورة
يامجبورة
افرحى وامرحى واوعى تترحى
واجمعى قلبك على قلبة
واوعى تطرحى
وعيشى بخيالك واسرحى
تعيشى العمر امورة
ياجابر
علشان خاطرى وخاطرك وخاطرها
خد بخاطرها وبحبك اخطرها
واوعى با اللى يزعلها تخطرها
دى الحنان كلة
حبيبة القلب السنيورة
ياجابر
اوعى عينك تزوغ وتروح لبعيد
دى مش محطة فى حياتك وتنزل
وتعيد وتزيد
دى لا عمرها خالفتك
ولا يوم بعدت عنك حبايبك ولا خلفتك
حقها عليك تعيش العمر مشكورة
يابورة
السعد وعد يابورة
ياريت ياجبورة انت ومجبورة
تختموها بعمرة او حجة مبرورة
دى هى المال والحافظة
وعلى بيتها ولكتاب ربنا حافظة
والله والله والله
دى تساوى مليون بلد ومحافظة
دى ملكة عفيفة نفس
عمرها ماكانت يوم ماجورة
بقلمى
محمد يونس
ليست هناك تعليقات:
إرسال تعليق