غنوه نصر
للشاعر السيد الشهاوي
يامصر قومي انهضي قومي اخلعي ثوب الشجن فوقي
قومي اضحكي
قومي البسي توب الفرح وردي
النصر من بعد الغياب بالصبر جالك من تاني
بسواعد مفتوله وهمه رجاله قويه وبالتحدي
قاموا يلبوا صوت الحق بيهتف
قوم يا عربي حقق حلمك
ارفع بسلاحك علمك
دا اليوم.. يومك
قاموا يلبوا نداك يامصر
التار..... التار
وانفجر البركان واشتعلت في كل مكان النار
وصحي العالم لجل يشوف اذاي بنعرف نمحي العار
لجل يشوف ليل يونيو صريع فجر اكتوبر رمضان
وعبرنا القنال
حملتنا الميه الطاهره للشط التاني
علي مركب من جسم شهيد
فوق بركه من دمه الطاهر
تدفعنا انفاسه الجايه من فوق م الجنه....... للنصر
ابدا مش حايضيع الدم الغالي ولا بد ترجع بسمه مصر
علي شفه طفل
وف غنا الطير ع الشجر
في ملامح شعب اقسم ما يدوق طعم الضحكه غير يوم النصر
وما بين الانفجارات وشظايا الدانات والضرب
اترفعت رايه مصر
فوق ارض سينا
وفي الجولان
والعالم كبر..... الله اكبر
والضحكه خرجت من بين الدخان
وشظايا الدانات والضرب
اعلي من صوت المدفع اكبرمن ان يطفيها شبح الحرب
ولاول مره اصدق ان النار
بتطفي يوم التار النار
يومها شفت الفرحه في عيون الرجال.. امل ونور
وشموع بتتهادي
ع الارض الغاليه
تمحي الشرور
وحمامه طاله من فوهه المدفع شايله فرع الزيتون الاخضر
فردت جناحاتها وطارت حره تنشد غنوه نصر
هذه الغنوه كتبتها علي الجبهه يوم ٩ اكتوبر يوم عبرت كتيبتي قناه السويس وكان هذا شرف لي
الشاعر السيد الشهاوي
ليست هناك تعليقات:
إرسال تعليق