توب الطيابه
*********
هاخلع توب الطيابه
واتعلم م الديابه
مادُمْتي يا دنيا غابه
هاتغير...
أول جرح في حياتي
كان م اللي كان حياتي
باعني معرفشِ ليه
كان ليه حبيته ليه
وليه سابني أتحير
هاتغير...
تاني جرح في عُمري
من صَحبي طول عمري
ياما قسمتهُ هُمومه
وإن زعلني ماالومه
ويوم مااحتجته إتغير
هاتغير...
تالت جرح يا ذُلي
من قَرايبي وأهلي
طغت الماده عليهم
باعوا الدم اللى فيهم
والود كُرهْ أدٓير
هاتغير...
قلبي من صدري هَشيلُه
وحُبي اللي كان خَليلُه
راح يتحول قساوه
أصل جراحي ماتداوه
لو حتى زماني أتغير
هاتغير...
هَطبْطبْ على روحي
وهَطيبْ أنا جروحي
ولا هشتكي الأيام
بإيديا هَقيد شموعي
بإيديا همسح دموعي
وأدوس على الآلام
مش هستنى الحنيه
من ناس قسيت عليه
وقتلولي الأحلام
أنا واحد شاف كتير
ومبقاش في العُمرِ كتير
أضيعهُ في أحزان
يعني حرام الإخلاص
الطيب ليه بنداس
وكتاب افراحهُ قُصٓيرْ
أنا عايز أعيش ياناس
مش مجروح الإحساس
ولا تايه ولا متحير
هاخلع توب الطيابه
واتعلم من الديابه
مادُمْتي يا دنيا غابه
وعُمْرِ الإخلاص قُصٓيرْ
هاتغير..........
الشاعر السيد حسن
ليست هناك تعليقات:
إرسال تعليق