اجمل صورة
*********
بحب اشوفك
في اجمل هيئة واجمل صورة
عايقة ورايقة دلوعة وسنيورة
ولا تبات افراحك مهجورة
انتي الجمال انتي الدلال
انتي العسل الغندورة
بحب اشوفك
في اجمل هيئة واجمل صورة
يا بهية ومين غيرك بهية
رغم جراح السنين قوية
واقفة بكل تحدي وايمان
لا هزك ريح ولا ايادي خفية
واخدة عهد ما تباتي مقهورة
بحب اشوفك
في اجمل هيئة واجمل صورة
يا غالية ومين غيرك غالي
ساكنة الفؤاد وحبك حلالي
عندي بالدنيا واغلا كمان
ومقامك عندي عالي في العلالي
وعيوني دايماً بيكي مبهورة
بحب اشوفك
في اجمل هيئة واجمل صورة
خدي بالك واسمعي نصيحة حبيب
مش كل من غنالك غنوة يا حلوة حبيب
كلمة باقولها وهافضل أقولها علطول
تحت الرماد موجود جُحر ديب
مستني لحظة تكوني فيها مكسورة
بحب اشوفك
في اجمل هيئة واجمل صورة
يا حبيبتي أنا عاشقك رغم الهموم
وحبك في قلبي بيزيد يوم عن يوم
مقدرش أشوف بيحوم حواليكي أشرار
عاملين نسور وهم في الأصل بوم
هزموكي بالقهر ويقولوا منصورة
بحب اشوفك
في اجمل هيئة واجمل صورة
أنا صابر ومستني عدل الزمان والكون
جوايا ليكي حلم كبير جداً ومجنون
إن أشوف الجنة بتسلم على ايديكي
وانتي الحورية والكل بيكي مفتون
وعنيكي على الغلبان طلعية في الصورة
بحب اشوفك
في اجمل هيئة واجمل صورة
الشاعر السيد حسن....
ليست هناك تعليقات:
إرسال تعليق