يا بحر بقلم هند غرس الله

 يا بحر

يا بحر جيتك في زياره ،عجبني موجك وسرحت مع هاك العباره..

هزيت عيني للسما وبكيت وخليت قلبي ينطق بكل أسراره..

قربت منك ودنيت وخطت على رملك"عيت"

بل موجك ثوبي بالماء كأنك تحب تخطفني ومعاك تاخذني..

من غير ما تشاورني؛ أنا جيت عاشقه فيك من كثر ما حدثوني عليك، جيت عاشقه فيك وراميه حملي عليك..

عارفه إنك تعبت وفديت ومن هموم الناس عيت..

اسمعني أنا هالمرة، الدنيا راهي مرة والفرحه فيها مرة والدمعه مش حابه تفارقني بالمرة..

ما تبخلش عليا وخليك سند ليا ؛وين يضيق قلبي نحكيلك شويه..

اسمعني وما تعاتبنيش افهمني وما تحاسبنيش..

خليني معاك نودع العالم الغريب إلي ما يخلي الحبيب يضم الحبيب..

خليني معاك نهاجر ونكتب على موجك إنت الصاحب والرفيق..

خليني كالغريق عايمه، تسبح روحي ويلفظ قلبي آخر الأوجاع والأنين..

وافرشلي رمل شطك ومد ذراعك نكمل عليه بقية الحلم الحزين..

تعبت من الزمان وبدني قطعه الوجع من الوريد لشريان، غاوي طبيب يضمد جروحه وينسيه في الأحزان..

اخترتك إنت على خاطر ممكن يكون الصديق غادر خوان..

أما إنت كالقصيد عندك لكل واحد منا فقل من حديد..

يا بحر جيت حافيه نشكيلك من الأيام قفلت الأبواب والشمس ما عادش تشرق كيف سائر الأيام..

والقافيه مجروحه حابسه في الكلام تسامر قمرة الليل وعملت الدمعه وساد..

اش نعمل..اش نعمل..العقل واعي بحكم ربي العالي والقلب غارق في الأحزان فاني..

قداش منه الصبر القلب ثقل كالجبل العالي، والدمع طم في مقلة العين هادي موجه مش حابب ينزل لا يحرق جفونه..

يا بحر..خلي موجك يدغدغ اقدامي وهواك يرفع حجابي وكون ساتر لكلامي..

هند غرس الله