ألو أسعاف ،،،، للشاعر/محمد ضباشه

! ألو أسعاف
للشاعر محمد ضباشه
----------------
أسعاف ... بلا إسعاف
من غير دوي ولا صوت
جت لما الحلم اندفن
بلا كفن للموت
ما فيها غير سرينة
ما تخلي حد يفوت
دا بس لجل المنظرة
وكأن العليل هلفوت
! أسعافنا باين من إسمها
مش بعدها ... بساعات
يكون النبض فرفر
واترحم علي اللي فات
ومهما ينادي شموسنا
? ليه لعب التلات ورقات
إن كانت حياتنا رخيصة
? إشمعني الفقير بالذات
محروم من أبسط حقوقة
والحق علي الأخوات
اللي بينهشوا لحمنا
ودفننا في بيرأ موات
وأنا عندي كام سؤال
بسألهم من صغر سني
? هي فين العدالة
يا عدل طمني
? وراحت فين الكرامة
في اللي وقع مني
? وليه ما لاقي حريتي
وعايش وكأني
محبوس في قفص كبير
عيونه تشاغلني
وما فيها ريحة صدق
ولا حد سأل عني
يا مفسدين الأرض
حبة صلاح لله
? ليه هاجرين السمع
ولا قلوبكم تحس بأه
وكل ما أفتح طريق
فساده نابت جواه
وطارحه يعمي العيون
وقمره باين تاه
جوه عشش دبابير
وحناجر ما قالت لا
ومصير خطاوي الغلابة
ضايع ... ويا أسفاه