وصيته ... رواية / رضا الحسيني

 

وصيته ... رواية / رضا الحسيني ( 17 )

.. ( الوصية )
_ واللي مش هيتقبَّل الكلام ده ؟
_ مش هيستفاد حاجة من عدم تقبُّله ياوجيدة ، لأن زهران عمل إجراء تاني احتياطي يحمي نجلاء ويضمن تحقيق رغباته ، والإجراء ده هيظهر في وقته المناسب طبعا وأنا وأمجد والحاج عبد الوهاب عارفينه وكنا معاه فيه
هكذا كانت الأمور واضحة أمام من سيحاول الجدال والرفض ، ثم تحدث أمجد ليردد أغلب الكلام الذي قاله حمامة ولكن بأسلوبه ، وكلاهما معروف لدى الجميع بالتدين والمصداقية ، وتربطهما علاقات قوية بحكم القرابة الشديدة بكل أسرة زهران من زوجته لإخوته لعديله ، فزهران ابن عم حمامة وابن خال أمجد
_ يعني نفهم من كده إن أخونا زهران لم يترك ميراثا ، وأن تركته توزع من بعد نجلاء
_ تمام كده ياوجيدة ، ومن بعد نجلاء رزقها الله الصحة والعافية ستوزع كل التركة المتبقية منها مناصفة بين ورثة زهران ونجلاء
_ ونجلاء لها الحق تتصرف زي ماتحب في التركة؟
_ أيوة ياست نونا هتعيش حياتها زيها زيكم ومتنسيش إنها شريكة زهران في كل شيء خلال رحلة سفرهم وتجارتهم وتعبهم سوى
_ مش عشان وجيدة ونونا بيسألو يبقى معترضين ، لا السؤال للفهم وبس ياأمجد
_ ده مفهوم يامُدَّثِر
كانت الجلسة في هذه اللحظات تتأرجح بين التوتر والاندهاش من تفكير زهران ، ورغم أن إخوته كانوا قد سمعوا من زهران نفس الكلام من قبل إلا أنهم كانوا على أمل أن تكون مجرد مقلب من مقالبه أو خديعة واختبار منه لهم ، فلم يكن يخطر ببالهم أبدا أن تصبح هذه هي الحقيقة ، وهنا قفز من وجيدة سؤال
_ ومين هم الورثة اللي هيكون لهم نصيب من بعد نجلاء من عندنا ومن عندها؟
_ ياوجيدة ورثتكم الشرعيين اللي عايشين وقت وفاة زهران بناء على إعلان الوراثة اللي هتعملوه من بكره ، والورثة من عند نجلاء برضو نفس الأمر ورثتها الشرعيين وقت وفاتها بناءا على إعلان الوراثة
_ استنى يا أمجد ، زهران وصى بالتبرع بكل مكونات بيته لجمعية خيرية ، يعني مفيش حد هياخد شيء أبدا من مكوناتها
أذهلت العبارة التي قالها حمامة الجميع ،
وغدا نستكمل الوصية