((فنون الغدر ))
كنت فاكر إني أنا
ملكت قلبك
وهمت نفسي بالغرام
قطعت عهدي أعيش حياتي
معاكي فى دربك
جردت نفسي م البشر
طاعة لودك
من جنون الشوق شكيت
حتى نفسي في يوم نسيت
لقيتني نازل بوس في يدك
لجل خاطري إشتريني
إنتشيني
تسولي كان كله قربك
كان نفسي أعيش ذي البشر
نرسم بإيدينا حلمنا
ويشجيني ردك
صحيح ساعتها ضمتيني
جوا حضنك
من غبائي كنت فاكره
حضن حب
لما نمت جوا منه
حسيت بأنه حضن غدر
طيب قوليلي
لما أنت ناويه تغدري
وتبيعي فيا وتشتري
نزلتي ليه بيا الميدان
كتبت كل الشعر فيكي
تسمعي ولابسه اللثام
من غبائي كنت فاكر
تمتمه أسمعها منك
إنها عشق وهيام
أتاري همسك وقتها
بتفكري ف الإنتقام
ذنبه ايه قلبي اللي
حبك ؟
تجبريه فى صغر سنه
ع الفطام
كنت أرحمي وعوديه
ع البعاد
يوم فطار ويوم صيام
تتفنني وتجهزي حربة سهامك
وفوق عرينك قلبي في
ايده راية السلام
ظلمتي قلبي
إزاي قوليلي عينك تنام
فوضت أمري للي عينه
مايوم تنام
نبيل عوض
١٩/١٢/٢٠٢٢
ليست هناك تعليقات:
إرسال تعليق