بينسوا الحلو في الآخر
بينسوا كل شيء فاخر
عملته وناوي تسعدهم
بينسوا مسكتك ايدهم
في وقت ما كانوا لسه ضعاف
بفضلك عدوا أزمتهم
بفضلك جبروا كسرتهم
ولما بينكسر قيدهم
يقابلوا الحب باستظراف
كأنه عادي بيعدي
شعورهم زي شئ مادي
يشوفوا مشاعرك استلطاف
مفيش قيمه لإحساسك
وتحبس كل أنفاسك
عشان تتخطي عمايلهم
تسيب الدنيا وتجيلهم
فيعملوا خلق من بنها
ونفس الخلق دي امبارح
بنفسك شيلت أحزانها
همومهم تجرحك فتئن
عذابهم يطعنك فتجن
وتعمل ثوره علشانهم
ونفس الخلق ببساطه
لغيرك فتحوا أحضانهم
وحنوا لحد يوم هانهم
يا حسره عليك
فتحت من الأمل شبابيك
لناس بايعاك
وقلبك نفسه سلمته
وسيبته هناك
بتترجي في أمل كداب
ومين حبيته لسه معاك؟
ما باعش وساب
ومين اهتم؟
موزع فرح ع الأحباب
وواخد هم
حياتك تتكتب في كتاب
وتتدرس وتُحفظ صم
وهبت الكل أحلامك
باعولك وهم
دا درس عشان تفوت طيبتك
تبطل تبقى راجل شهم
وسيب مسافات في علاقاتك
وسيب روحك بدون تدنيس
بدون إدراك بتتحول
وتبقي نسخه من إبليس
تعادي كل شيء من نور
وفي العتمه تلاقي أنيس
وليه ضليت ؟؟؟
عشان حبيت.......
بفطره ساذجه وعليله
بكل جوارحك اتشديت
مطاوع قلبك الحيله
بدون تفكير
رميت نفسك في وهم كبير
يا شيخ بلا حب بلا نيله
وقعت في ناس ما هش شبهك
باعوك في مزاد بتسعيره
كفايه وفوق
ولما تحب حب بذوق
ولو قلبك رماه الشوق
ما توهبهوش
لناس مشبوهه وحقيره
بقلمي حسام العقاد
ليست هناك تعليقات:
إرسال تعليق