. نواب الشعب
أنا عــايز نايـــــب يوصــلي قــــــدام البــاب
يسمعنى ويعرض طلبــاتى ويـــدينى جــواب
ويكون أستــــــاذ تحت القـــــبة بــين النواب
ماش فارقة معايا يكون شايب أو لسـه شباب
يا ما نـايب جبــــناه بأيـــدينـا وطـــلع كـداب
عايزين الشعب يـكـون كتـلة سلـطة وأحـزاب
مصر المحروسة مهش عـزبة أو أرض خـراب
أو بوطة وفاتحينها وكــالة من غـير بــواب
أو دفتر مصاريف عالـنوتة مــــلهاش حســاب
كات غلطة ومش حنكررها ونعـيش فى عذاب
.........
أنا عايز نــــايب للــدايرة ويــــــكون محبوب
يصفح ويسامح عن قوة ؛ ويبــــــات مغلوب
فى الدايرة بتاعته يكون فيها انسان مرغوب
بمجرد بصه على وشوشــــنا يقــــرا المكتوب
من قلب العداية مصحح مــش كله عـــــيوب
بالحق يكون دايـــــــما واقــــف ويـا المغلوب
مش خيخة ينافق من خـوفه وعليه مغضوب
لو بنطق تهتــــــز القــــــبة ثــاير مهـــــيوب
شخصية وواجــهة وقـيامة ويكـــون مندوب
مش هـلف يهرتل بلساننا ؛ ويحــــدف طوب
......
أنا نفسى فنايب للأمة فـــــارس وهـــــــمام
مش ناقصاه رسمة ولا وجاهة صاحب هندام
من قبل ما يتــــــكلم يعرف حيــــــزعل كام
مش يحســب أنه بيتكلم قــــــدام أغــــــنام
دا الشعب عظيم محتاج راجل يسهر ما ينام!
ايه يعنى حصانة ف جيب خايب بياع برشام
أو مع واحــــــد قـــــــــبل مــا ينــــــــــــجح
شـــــــــــوف دافـــــــــــع كــــــــــــــــــــــام
ياما نواب جبــنا بأيادينا بأمـــان وسلام
قضوا السنـــوات تحت القبة زى الأصنام
......
للشعب : ايــاكم تختـاروا نــايب هلفــــوت
عايزين نـــواب عالفــــرازة لو حتى نــموت
الـعمر سـريـعا راح يخلص والـدورة تـفــوت
الناس م الشعب المتحنط مش لاقية القـوت
روحوا لمطالبنا وهـاتـوها مـن بـطن الحوت
بالعـقل المــركب حتــعدي مــــــش بالنـبوت
لا جعير راح يبنى لنا بلدنا ولا غلض الصوت
الناس فى الدول العـــربية عمـــالة تـــموت
وحتفضل مصر المحروسة برجـــالها كـيوت
تفديها ؛ وتزرع أراضيها . بســاتين وبيـوت
...........................................................
شعبان البنا
مصر.. البحيرة
الأحد / ٢٧/سبتمبر/٢٠٢٥
ليست هناك تعليقات:
إرسال تعليق