( خدني الحنين )
من بعيد
شوفت بعينيا شوية شباب
ع النواصي متلطعين
سألتهم من غير عتاب
انتوا مين
ردوا عليا إحنا مين
أنت إللي مين
سكت الكلام
وقلت بصوت حزين
فين الأدب فين الخشىٰ
فين الصحاب المخلصين
مسلم مسيحي
كنا يوماتي متجمعين
وبتسألوا أنا أبقى مين
روحوا اسألوا
عني الشوارع والحارات
أنا الماضي الجميل
أنا الزمن الحلو إللي فات
خدني الحنين
خدني الحنين لأهل حيَّنَا الطيبين
روحت أدور ع الصحاب المخلصين
فين الوشوش الطيبة
شايف عيون متغربه
حتى الصبايا سألتهم
كانت هنا بنت الجيران
هنا نقشنا إسمنا ع الحيطان
ولسه بردوا بتسألوا
أنا أبقى مين
خدني الحنين
خدني الحنين لمدرستنا والكتاب
روحت جاري لحد باب المدرسة
قربت منه ...وفلحظه
لاقيت قلبي.. بيتنطط م الفرحة
ويا دوب وصلت.. عقلي أنصدم
مش هما دول
صحابي بتوع زمان
ولا هما دول مدرسيني والعيال
دخلت أجري ع الفصول
سمعت دقات الطبول
ونشيد تحية العلم
قلت يا ناس
لسه فيه عندي أمل
شيء محتمل
إني أقابل حد
من صحابي القدام
أو حتى أشوف مدير المدرسة
يمكن يقولي أي كلمة كويسه
مش هي مدرستي
ولا هما دول مدرسيني والعيال
أنا كان عندي يا ناس مُدرسه
كانت تدرس لي العلوم والهندسة
وكمان القراءة والحساب
من حبها...بنبقى طايرين فوق السحاب
وف مره غبت عنها
قالتلي ليه كنت غايب يا ولد
قلتلها بصوت حزين
امبارح أمي ماتت
الضحكه الحلوه غابت
ودموع عينيا شابت
راحت خدتني في حضنها
ضمتني ضمة...سمعت صوت قلبها
وسمعت صوت من عدم
منك يا دنيا قلبي انظلم
حتى السنين
اديتني ميت مليون قلم
مش مصدقين
روحوا اسألوا عني السنين
مجروح وقلبي ليها...مليان حنين
خدني الحنين
خدني الحنين
الفيلسوف العاشق
حسن هاشم
فجر اليوم السبت 11 أكتوبر 2025
ليست هناك تعليقات:
إرسال تعليق