إمسك حرامي
شعر هاني الحداد
إمسك حرامي
وكمان حرامي
وكل يوم نسمع أسامي
مالهاش عدد
أصل القضية
في المحسوبية
واللي عايشين في التكيه
مش في بلد
ويتعبك ويجننك اكتر واكتر
إن كل مادا الدايره دي بتكبر
وتضم ناس مستحيل فيهم تفكر
يبقوا كدا طب ليه كدا
ناقصين وجاها ولاشهره ولامال
وليه بجد مغرمين بالشمال
وف شرعهم لأ مفيش كلمه حلال
ولافيه رضا طب ليه كدا
فساد وعشش
في القلوب وفي الضماير
وإزاي هنقدر
وإحنا بنلف في دواير
متحكمين دول
في الكراسي والمناصب
سايبين لنا إحنا
المآسي و النصايب
ويتعبك ويجننك اكتر واكتر
إن كل مادا الدايره دي بتكبر
وتضم ناس مستحيل فيهم تفكر
يبقوا كدا طب ليه كدا
ناقصين وجاها ولاشهره ولامال
وليه بجد مغرمين بالشمال
وف شرعهم لأ مفيش كلمه حلال
ولافيه رضا طب ليه كدا
فين الشرف
فين الأمانه اللي ما بيننا
أخلاقنا
ليه ساءت و نسينا ديينا
اسرق برحتك
و إملي صحيفتك بالذنوب
بس إفتكر أهم حاجة
إن الكفن مالوش جيوب
ليست هناك تعليقات:
إرسال تعليق