ريحة بلادي
ماهيش كيف العادة
ياسمينها ذبل
والأرض ماها شحيح
ريحة شواء
الأكباد و الولادة
عالي رحل
والي عليه يصيح ..!
عيد السنة ماهوش لينا
للناس الي ضحكو علينا
الي باع الوطن وذرارينا
خبا الصوارد وقال خلينا
غدوة نفرق على الزوالي
دينار و دينارين يكفينا
نستاهلو الي جرى علينا
الطمع طار بيهم للعلالي...
والي بسلاحه انقتل
يستاهل التذبيح !
ريحة عفن
الموت وراها الموت
والي ماندري اندفن
والا سكر الحانوت ..
والي في قصره سكن
ويعلي في الحيوط..
ناسي الكفن
يوم الحساب يفوت
فوق الحبل
ما عنده وين يميح..!
العيد حاضر
والكفوف تمدًٌو
والجار حاير
ما لقيت باش نودًو..
الروح ضايقة
طارت لخالقها
والبسمة واحلة
منهو لي خانقها ..
الفقر داير
ما لقيت كيف نشدو
دايم علينا يطل
و لوين بش نروح..!
الشعب ضايع
من الوضع متأزم..
للشارع طالع
حالف ومتحزم ..
واسمع يا سامع
قلب الوطن يتكلم..
همٌه حمل رجل برجل
لا حد منا يطيح
ومن الوحل نطلع نطل
على أكتاف الريح...!
ليلى_السليطي
ليست هناك تعليقات:
إرسال تعليق