***توحشتك ***توحشتك والوحش ما فيه مساله...ومن يتوحش خير من قاطع لياس
توحشتك ونقول وانا في حالة...معشوقة وكلامها نشرة للراس
توحشتك ودموع عيني سيالة....مارتها علخد ولا ضربة فاس
توحشتك وكل الجوارح سوالة...اقلعي عني هم قلبي والتهواس
توحشتك هاو ارفعي عني حالة....حالة عبد ضرير بغرامك قوساس
توحشتك وانقول بنت الرجالا...ناس القمنة ناسها ماهم كي ناس
ناس اهل البارود نارو شعالة...يوم الشدة تصيبهم فعل وقمباس
........
وكون نقول الصح صح توحشتك....من وحشك عليل ما راني لاباس
اتوحشت كلام واسحرني حرفك....واقصايد متنوعة كي روح الكاس
ها قولي لباك يرضى لي قربك....انقيمو لفراح وانزيدو لعراس
...........
توحشت الريم يا الاهي من هجر اعوام.
توحشت كلام
باسباب الحاسدين ضرو واعلالو
فرقو بيناتنا سنين قوم الظلام
فالشرع احرام
ما حسو شوق الغرام وتهوالو
ننظر اسما تبان قمرة والبدر اتمام
في ليل اظلام
تطوال ايامي معاه ويزيد امجالو
نهواها فالجنان زهرة تبري لسقام
الكذب حرام
ونحفظ اثمار الغرام عمر وما طالو
يا سايل لا تقول ننسى بدر التمام
والحب دوام
يبرى قلبي من الهو ونطب اعلالو
يتهنى بالحديث قلبي من بعد صوام
من غيبة عام
في بحر العز ماشية امواجو تهدالو
ما نسمع منها عتاب ولا تلوام
من طيب كلام
تغدى عني هموم قلبي واهوالو
هذا شعري كلام والقول تمام
قوم الظلام
وسلامي من سلام ناس اللي سالو
جلول قيايدة
جدال 
