( جدير بالذِكر )
اوعى تصدق
انك شايف وانك عارف
وانك فاهم
كل الناس حواليك
اللي بمكرُه جاى يتخفى
فاكر إنهُ
مغَمي عينيك
واللي معاك مكشوف وشه
ولسه مكَمل يلعب بيك
ناس شياطين
والفرق اللبس
وناس كومبارس
وناس أدوارها حَسب النَقص
بترمي كل عيوبها عليك
واللي بينهش واللي بيلطش
واللي في وقت الشدة يطنش
واللي يبيعك
واللي شاريك
تعابين وأفاعي
وضماير جُملة وقطاعي
وناس معادينها صَفيح
ومشاعر مراجيح
حسب المَصلحة بتعَليك
واللي بيحلف إنهُ حبيبك
ومِن ورا ضَهرك
بيكَسَر فيك
والمغروزة ف قلبَك ضوافرهم
بَعد ما باسوا إيديك
بُص شِمالك
بُص يمين
مين مع مين
طاحونة لطحن البنى آدمين
و٢٠٠ دوامة
تقلِب رأس معاليك
لَمة كبيرة وهوجة وسوق
صَحصَح فوووق
واجمع كل دفاتر عُمرك
وانا هَاحسب لك
كام واحد غابوا
وفاضل كام
الدُنيا يا صاحبي
زحام في زحام
والكل بيتزاحم
اوعى تقولي إنك فاهم
تبقى في عُرف زمنا مُسالم
عايش في الأوهام
متعلمتش شيء في حياتك
متعلمتش م الأيام
وكل سنينك راحت منك
كلام في كلام
الدُنيا يا صاحبي
عايز كام
متستغربش
تصدق أو متصدقش
الأمر بسيط
خليك ماشي جَنب الحيط
وازرع علشانهُم شجر الفُل
واحصد منهم نار تكويك
شيل على أد ما تقدر
مِن أوجاعهم
مِن أحزانهم
وامسح دمعة عينهم
وابكي لوحدك
مايهمكش
لو كانوا في أفراحهم نسيوك
كلمة طيب بتراضي
والمليان بيكب على الفاضي
ونجوم السما فوانيس بتحييك
وابلع لحبايبك مليون غَلطة
وقوول الله
واعمل خير تلاقيه في البحر
وانتَ وراه
وعلى أد لحافك مدْد رجليك
وخليك نايم جوه مبادئك
بكره جراحهم هَتصحيك
وجدير بالذِكر
إني أقولك إنك خايب
زرعك دايما
في أراضي بور
مابتطرحش عشان تديك
وجدير بالذِكر
إني نويت أتبرأ منَك
وأمحي مني كل ملامحك
وهاكون ضِدَك وأعاديك
وخليك فاهم
انك فاهم
كُل الناس حواليك
كلمات /
أسامة أحمد رفعت
