سباعيه غنائيه ....... أنا فرعوني بقلم الفلاح الفصيح معوض حلمي منشأة بطاش تمي الأمديد دقهلية

سباعيه غنائيه

....... أنا فرعوني ........

.................................

ياساكنه بين حنايا الروح

كتبتك شعر من دمي
وصفتك ورده زي امي
ناديتك لما زاد همي
تلمي جرحنا المفتوح

ياساكنه بين حنايا الروح

مانيش عارف أبوح ازاي
يالحن خلود ياصوت الناي
ياورد الدوح مانيش نساي
انا جايلك أداوي جروح

ياساكنه بين حنايا الروح

انا شايف وشوش كشره
سمومها بينا .... منتشره
ماهيش باقيه على العشره
ولا سايبانا نبني صروح

ياساكنه بين حنايا الروح

انا فرعوني من صلبك
عودي من فولاذ صلبك
هاشد الحزن من غلبك
واشوفك ورد مالي الدوح

ياساكنه بين حنايا الروح

يافاتحه الحضن لدفانا
وفارده جناح محوطانا
ومادا إيديكي لمانا
عطرك جوا هوانا يفوح

ياساكنه بين حنايا الروح

وشمك منقوش بالحنه
وانا عاشق وصفك واتمنى
من نهر دلالك واتحني
وانسى معاكي سنين النوح

ياساكنه بين حنايا الروح

أنا مينا باوحد في ترابك
أنا شوكه ف حلق غرابك
وبشك بقوه لسان عابك
يانبض وريدي منين ماأروح

ياساكنه بين حنايا الروح
...................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية