نفسي أبكي------------------
بس أجيب مين
يمسح دمعتي
جوايا حزن بقالوا سنين
وفرحة مفارقة دنيتي..
آه...لو تتكلمي !!
وتقولي ليه حزينة
مين خلاكي
جوه العين سجينة
مين طفى شموعك
بين جفوني
ليه بقيتي للزمان تهوني
فين راحوا حبايبك
والأفراح والهنا نسيوكي
آه.....لو تتكلمي !!
أحكيلي عن أيام زمان
فين راح الأمان
والفرح والهنا
وفى توهة الأيام
ما عرفتش مين أنا
يا دنيا مش دنيتي
فين راحت فرحتي
آه... لو تتكلمي !!
يا دمعة أحكي وفضفضي
كنت زمان أنا قد جروحي
كنت بداوي وأصبر روحي
ولا ولا..مالاقي دوايا
كانت ما بتفرقشي معايا
تيجي يا دنيا..ولا تروحي
آه.... لو تتكلمي
جوايا بركان ألم... وجع
وقلبي من كتر الهموم.. اتوجع
يا شمس يا مروحة
سيباني ليه للغروب
العين مفارقها النوم
لا مغمضة ولا مفتحة
الفرح لو يجي يوم
تفتح كل الدروب
وتكمل فرحتي...
آه.. لو تتكلمي
يا دمعة أحكي.. أو حتى أشتكي
نفسي أبكي..................
بقلم / يحيى المنياوي
ليست هناك تعليقات:
إرسال تعليق