كل عام وانتم بخير وصحة وسعادة دائمة
.....................................................
البرنامـــــــج الرمضـــاني لعـام 2024
خماسـيات الفـلاح الفصــــيح كامــــلا
1
................ جيت عريان ................
عيــش الدنـيا بأصــولـها ونـام مــرتاح
جيت عريان وهاتسيبها بعويل وصياح
ومابين الجيه والروحه دمـوع وافراح
فسيب سيرتك مابين الـناس ووضــيها
عشـان النـاس تصــليها مـسا وصــباح
..................................................
2
................. أسمى دين ................
رمضان ف غ زه السنادي جـاي حزين
ع المسلمين واقف ينادي إنتــوا فـين
البرد بينهش ف العيال والجـــوع لعين
ليه سيبـتوا أعـداء الإلـه بيعــــربدوا
وليه ياساده بتبعدوا ، عن أسـمى دين
..................................................
3
............... ناس و ناس ..............
فيـه ناس القاعده وياها كعطر يفوح
تحـس براحـه طـراحه وبراح مفتوح
وناس والله مكــروهه مكـان ماتروح
والدنيا مـــن دا ودا دايره ســواقيها
وناس تلاقيها وناس تكره لقـاها الروح
...................................................
4
................. يام البراح .................
يام البراح والوسـع والدفا ف طوبه
مش قولتي عني جدع ولقلبي محبوبه
رميتي ليا الشـبك ، وبضحكه ملعــوبه
فتحتي باب العشم ورسمتي لي الجنه
روحت اشتري الحنه لقيتكي مخطوبه
...................................................
5
................. رب قلوب ..................
أنا خدت من أيوب صبره على المحنه
لو نرضى بالمكتوب هانداوي ف جراحنا
وعشان يزول الأسى ، ونزيد ف أفراحنا
باب الدعا مفتوح والشرط بس نتوب
والرب رب قلوب ، أقســــم يسـامحنا
...................................................
6
............... فيل 🐘 أبرهة ...............
وطن العلوم والأدب ، السوسه لعبت فيه
وطيـنا كل جلــيل ، ورفعـنا كـل سفـيه
طبعنا ضهر الخـيل ، وسيـوفنا تلمـت ليه
من ناحيه هبوا الفرس وفغزه فيل أبرهه
والأمـه ضاع مجدها ، بالرقص والترفـيه
ـــــــــــــــــــــــــــــــــــــــــــــــــــــــــــــــ
7
............ شفاعة المصطفى ............
الموت بيقبض ف الميعاد أجدعها روح
فاوعـاك تسـلم للطــمع عمـــرك يـروح
ماينول شفـاعة المصـطفى ف يوم الفزع
غـــير الضــمير الحــي نبراس الــورع
وقلـب عاش الدنيا يلحــم ف الجروح
ـــــــــــــــــــــــــــــــــــــــــــــــــــــــــــــــ
8
................. هـــــل نـور ................
يوم ميلاد الهادي لينا هل نور الفجر لاح
بعد توهه ودايره بينا ، خد بإيدنا للفلاح
هد جهل بيغوي فينا وظلم ليله مستباح
جـــاي بفرحـــــه ، ونـــــور ورحـــمه
جاي هدايه وعدل موسـوم بالسـماح
...................................................
9
.............. جرح القرايب ................
تايه ياخط السير ، والسـر في الفكره
راحـوا الحبايب كتير وسابونا للذكرى
جرح القرايب خطير لابيشفى ولابيبرا
بيعنا اللي بينا رخيص وشيطانا راكبينوا
حتى اللسان سايبينوا يلدغ كما الكوبرا
...................................................
10
.............. الغنوه للمحصول ..............
فاكـر زمـان الصبا ، والغنوه للمحصــول
واللمه كات طبطبه ، نلعب سوا ونصول
الصحبه كات طيبه ، والكلمه ليها أصول
الجار لجاره ونس ، ومكانش فيه كهربا
نتلموا ع المصطبه ، والود كان موصول
....................................................
11
.............. حــــدود الأدب ...............
الزم حدود الأدب ، واياك تضيع طريق
افرد دفاك ع السكك ، مد الإيدين لغريق
افتح بيبان العتب واوفي العهود ياصديق
واياك تبيع أخرتك وتعيش كديب مسعور
وتمـد ناب الـزور ، وتخــوف المخاليـق
....................................................
12
............. بنتدعي الأخلاق ..............
الصـبر طـيب نعـم ولكـل صــبر حدود
بعـد الأمان والنـعم ، الهـــم ليه ممدود
واحلف بجـاه المصطفى وربنا المعـبود
بنشكي مر الحـال واحنا العـلل والداء
بنتدعي الأخلاق ، وقلوبنا كالحه وسود
.....................................................
13
.................. المـــــلاس .................
فاكر زمان الهـنا ، والغـيط ملان بالناس
نروي السنابل غنا ، واكتافنا شايله الفاس
وناس بتعزء هنا ، وناس على الملاس
وابويا اللي كان بيدور ، ويدور الطنبور
كات هدمته الكاستور ، أغلى من الألماس
....................................................
14
................. لساه آمين ................
ياكل الساده هنا والسـيدات سامعـين
مرت علينا سـنه وقبليها مـرت سـنين
الصبر أخره الرضا ، بيوصـل التايهين
فبـلاش نسب الزمـن ونسب أقـدارنا
احـنا اللي مررنا ، والزمن لسـاه آمين
...................................................
15
............... السريس والمش .............
فينها الرحايه ياخلق ، والفرن ليه هدوه
المر سـد الحـلق ، والجورن فين ودووه
التور عليه الناف ، وع المدار غمووووه
الميه ماليه البير ، والساقيه دايره توش
بعد السريس والمش إزاي هاناكلوا جاتوه
....................................................
16
................ جناح المرح ...............
إسـمع لقلـب الطـير بيغـني لو مجروح
ابدر حنـانك خـير ، خلي القساوه تروح
واياك تسيب كلمتك تفتح بيبان النوح
واياك تبوح بالألم ، تكسر جناح المرح
بكره هاتطرح فرح وتطيب جراح الروح
...................................................
17
.............. فتحي البريشي ..............
سيرتك يافتحي هنا ع الساحه تحرسنا
إن ميلنا عـن نهجنا ف وداننا تقرصنا
ولسه حرفك عفـي ف الضلمه نبراسنا
خـيال وليك علامات والطيبه عنوانك
وسيبت إلهامك يوصـف همـوم ناسـنا
.....................................................
18
.............. النيه مش سالكه .............
زنبيل زمان اتملى ، كان بالحنان بيشر
دلوقتي صابه البلا ، عباه وسرسب مر
هجرنا بيت الصلا ، وقلوبنا صابها الضر
الدار فريح الدار ، بس البيبان سـكه
النيه مش سالكه ، ولاعادش حاجه تسر
.....................................................
19
................ لون الوشوش ..............
الناس بتسأل خوف عايزين يلاقوا طبيب
لون الوشوش مخطوف والرعشه زي الديب
ليه الدوا موصوف والجرح مش بيطيب
العتـمه ماليـه السكـك وعيـونها نواحـه
السر في التفاحه ، الا في علم الغيب ..؟
.....................................................
20
.................. طبـطـب ..................
لكل مركـب بحـر ، ولكل بحر مراسي
لكل واحـد ضـهر ، ولكل ضـهر مآسي
عشان تدوم الحياه ماتكونش زول قاسي
لو مره ولفك زعل ، عشان نسيت ضله
طبطب عليه وقوله ، حـقك على راسي
....................................................
21
................ إمسك لسانك ...............
إمسك لسانك عليك ، وســـد باب دارك
مشيك مع الكداب ، هايزيد في أوزارك
خلي الكلام بحساب لو شوفته أو زارك
واوعاك تلوم الزمن لو هاتجاريه ف الزور
بكره يجيك الدور ، ويذيع ف أسـرارك
....................................................
22
.................. مش للغنا .................
ياكـل شاعـر هـنا ، عبى الحروف أوزار
ودار يهــد البـنى ، ويلــــوث الأفـــكار
الشعـر مـش للـغـنا ، ولا هــو دقـــة زار
خلي الحروف لله ، صليها سنه وفرض
دا الشعر يوم العرض ، ممـكن يودي النار
...................................................
23
.............. سيـف الفـراق ..............
سابتني وماتت الغيه ، وساقني الطيش
وقلت الخلق نسايه ، وفرحهم جيــش
دفنت حنانها بإيديا ، وقلـت هاعيـش
رجعت أنادي ياستي ، في وسط الدار
وسيف الفراق بتار ، نتـف لي الريـش
..................................................
24
............... وابـور الجـــاز ...............
فليت تراب البلد عن قرش ساغ مالقيتش
ولا شوفت خيمه ووتد ولا حتى زلعة مش
سألت شيخ المدد قاللي اللي راح ماراجعش
حنيت للعب المصطبه وطبيخ وابور الجاز
لما ابتليـت بالغـاز ، ورغيـف مابيشـبعش
....................................................
25
................ دموع الأسى ..................
داريت دموع الأسى ومليت بضحكي الدور
عشان اشـوف الناس ف بلـدنا زي الحــور
وازرع غيطانهم سـجر ، وارويها بالطنـبور
وادور والف السـكك واملى بغناي الفضا
وابدر تقـاوي الرضـا ، تطـرح محبه زنور
.....................................................
26
................ عبى البناني ................
الكل مليـان آسـى ، الكل طالع م الهـدوم
الفرح بينا اتنسي ، والـود ليه معــدوم
الجـهل بينا سرح ، عبى البناني همـوم
لونا وش الزمــــن ، بالآهـــه والدمــــعه
لافايده ف الجامعه، ولادكتـوراه وعلـوم
.....................................................
27
............... إبدأ بروحك ................
عايز تصـلح في البشـر إبدأ بروحـك
إياك شيـطانك يهزمـك ويزل روحـك
إمسك بإيدك دفتك ، روض طموحـك
إزرع الخـــير وارمـيه في علــم الله
في السكه راح تلقاه ، طب لجروحـك
..................................................
28
.................. مكتـــوبنا ..................
طمعنا لابس عمته ، وسـايقـنا لعيـوبنا
الكـل راسم عفـته ، عاصيين وما توبنا
ولاحد راضي بقسمته ولاعاجبه مكتوبنا
الواد مخاصم أبوه والباب في وش الباب
عايشين كما لاغراب ، وشق الآسى توبنا
....................................................
29
............... الود والعشرة ................
الحب الحـلال يجلي الروح ويعلى بها
تصبح بيوتنا مؤمـنه ، والطـهر اعتـابها
فيها الوليف يحــرس للوليـفه ابوابـها
يصــون الــود والعشــره يشيــلها تاج
وان خوفها هاج ، حنانه يسـبق عتابها
..................................................
30
................ آمن ياخلي ................
آمـن ياخـلي برزقــك ، وهـدي تأويلك
واوعاك طمعها يزلك ، ويهد لك حيلك
زي اللي ضـــاع منـك لابد هايجـيلك
دنيا دنيـــه قــــوي وزينتها خــداعه
وعشان تنول الشفاعه إثبت على دينك
...................................................
خماسية العيد
............... العيد عيدين ................
العيد عيــــدين ياقلوب جميله وآمنه
والحب دين يهـدي اللي شــــارد مننا
مدوا الإيدين لقلـوبنا تطـرح سـوسنه
وانا جيت اعيد ع الحبايب أجمـعـين
دمتــــم بخـــير والمــــشاعر مـؤمــنه
...................................................
بقلمي .. معوض حلمي الفلاح الفصيح
منشأة بطاش .. تمي الأمديد .. دقهلية
ليست هناك تعليقات:
إرسال تعليق