كــــر بــا ك ورا
----------------------------
للشاعر / محمد عبد الفضيل
--------------------------------
تفتكري إيه
غير الحكاوي التايهه
ف غيطان الدره
والغلطه لو كات غلطتي
مكـنـوش يهدوا ف القري
كرباك ورا
نزل جناب الست عند المسقه
تغسل رجلها
وأضرب حمار الغيط
ليرفس وسطها
فرحانه هيا باللي زيط وسط هيصه
واللي يطبل للعجوز تبقي عروسه
مين اللي دور ساقيتي
مع أنهم دبحوا الجاموسه
يا واد يا ســو سه
بطل تبرطم بالكلام اللي ما يوزن خردله
وأسكت لبكره تلقي عيشه مقندله
كرباك ورا
خلي حصان الباشا يرمح ف الميدان
يشطح وينطح لجل ما يعيش الجبان
وحمارتك العارجه تنهق ف المكان
ما هي أصلها نسيت تدوس ع الفرمله
كرباك ورا
يا أمه داعيه للجنان
ولسه راسك ف الخلا
دا دعاكي وقت الحق بان
يا تاركه خمسه م الصلا
كرباك ورا
فرمل يا عم بلاش نكــــد
خليني ألحق أتخمد
أنا ممكن أصحي أو أ موت
ولسه باقيه المشكله
ولسه باقيه المشكله
---------------------------------------------------------------------
ليست هناك تعليقات:
إرسال تعليق