تنابلة السلطان
_________
قاعدين ع القهاوي
يكركروا الشيشة
والراديو والغناوي
وشهر حاضن شهر
وصور متلزقة
على حيطان المكان
متلونة بالقهر
وأنا قاعد
بأمضغ ف السكات
أبويا مات
كان يوم سبت
والسبت فات
والحد فات
وبعدبكرة يوم التلات
إحنا هنا. ..
ولحد مايجينا الممات
من كتر الهم
قلبي إنحنى
من السكات
قالوا أصبر
ع اللي فات
وفضلت صابر
حد ما صرخ
صمت السكات
والدمعة هجت
من عيوني
مليانة وجع
أم كلثوم والأهات
كنت أسمعها بقلبي
قبل الودان
وصوت أمي جاي
قوم إتوضا
الفجر على أدان
فركت عيني
الغرقانة سهر
إبتسمت
ليل طويل
تاه الصبح جواه
إللي فات
إللي راح
حرف مخنوق م السكات
جوايا ياما حكايات
ألف رحمة ونور يامه
ويرحم أبوي
إللى من زمن مات
بقلمي
الناقد
حمدي البوقي
ليست هناك تعليقات:
إرسال تعليق