القصيدة كاملة
روح رُوحي-1-
لَيّامْ شِبْهْ مْنامْ راحْلاتْ سْوابِڨْ
مِثْلْ السّْحُبْ مِتْراكْضاتْ غْيِمَّه
وْ ساعاتْ الصّفَا لمّا تْهِلْ تْوافڨْ
شادِن شرِدْ شرّادْ و اهْلُو ڨْيِمَّه
عنْ سِرْبِتُو وْمطْراحْتُو عَالذِّمّه
بْعِينِي شْبَحْتْ امِّيمْتُو تِتْضَمّى
واشْ اللِّي يْلِزّْ الجّدْي يُفْرُڨْ أٌمّهْ.......... يا روحْ رُوحي
و الطِّيرْ يا روحي تِطُولْ رْيُوشُو
يُهْجُرْ لذيذْ الْوَكْرْ يَنْسى عْشُوشُو
وِسْعْ الْبَسيطه فْجُوجْ ما يْسيعُوشُو
يْعَلِّي وْ ما يْحَكِّرْ خْطَارْ الڨِمّه .......يا رُوحْ رُوحِي
و الصُّغْرْ يا رُوحِي مْثيلْ بْيايَه
لاَ يَتْشْرَى بِكْنوزْ لاَ بِحْلاَيَه
لكنْ زْمانُو ڨْصِيرْ ڨُصْرْ حْكَايَه
و الكُبْرْ خَيّابْ الرّْهُوطْ مَا اسَمَّه .... يا رُوحْ رُوحِي
**********************
رُوحْ رُوحِي -2-
الصُّغْرْ يا رُوحِي حْصَانُو مَارڨْ
لاَ لْجامْ ضَامِنْ لا تْكيدُو خْوارڨْ
سْوامِيرْ تِتْلاهِبْ تْهِبّْ حْوارِڨْ
خْفِيفْ العْڨَلْ يْروحْ فِيها عْدَمَّه ... يا رُوحْ رُوحِي
وِ الصُّغْرْ يَا صُغْرِي زْيُونُو بْزَايِدْ
تَرّاسْ فَارعْ مَا يْعَبِّرْ ڨايِدْ
يَصْهِلْ صْهِيلُو مَا تْصُدّو حْدْايِدْ
عَنْبِرْ و مِسْكْ يْرَجّلُو عَالْلِمّه .... يا رُوحْ رُوحِي
وْ هِيّ الصْبِيّه غْثِيثْها مِتْمارِدْ
وْ هْذُوبْها مْكاحِلْ نْوَاعِسْ شَارِدْ
وَ العُودْ سَرْوِلْ مَرْمْراتُو نْوَاهِدْ
وَ انْتَ عْيُونْ الطِّيرْ حَامِلْ هَمّهْ .... يا رُوحْ رُوحِي
الصُّغْرْ يا رُوحِي شَبابْ وْ شَبّه
و الْعِشْڨْ لَمّا يْجُورْ مِنْفِي السِّبّه
والفَلَكْ مَا يَعْمِرْ بْلاَشْ مْحَبّه
وْ في اوْقاتْهِا مَا تْلُومْهاشْ لْوِمّه ....يا رُوحْ رُوحِي
***********************
رُوح رُوحِي -3
وْ تُزْهِرْ زُهورْ الوّدّ زَهْره وْ زَهره
وْ تَطْرَحْ حْمايِلْها انْواعْ الثّمْرَه
و النّخْلْ يَهْديلِكْ شَهَدْ فِ التَمْرَه
وْ الدِّفْلَة مَا تَنْبَعْ سِوَى بالْمُرّه ... يا رُوحْ رُوحِي
وْ لَمّا الرِّبيعْ يْهِمّْ يَطْفَحْ حَدّه
يَحْزنْ جنانْ الزّهْوْ يِذْبِلْ وَرْدَه
تْجَاوِبْ رِياحْ إنْذارْ ڨُصْرْ المُدّه
يِسْرِعْ نْزُولْ أوْقَاتْهَا بِالذِّمّه ... يا رُوحْ رُوحِي
وْ يْدُولْ الدّوَالْ حْوِيلْ يِرْخِي حْمَالَهْ
مْكَدِّرْ غْيُومُو مْذَاهْباتْ احْوَالَه
مْزَاريڨْ فَجَرَه بَاهْتَه مِذْبالَه
وْ اثْڨَالْ ماصْعِبْ حَمْلْها يا يُمّه ... يا روحْ رُوحي
هكّه فُصُولْ عْمَارْنَا تِتْعَدّى
وَ أَمْثالْهَا مِتْجَرّْبَه مِنْ مُدَّه
لَحْبابْ تِتْعَارفْ زْمَانْ الشِّدّه
وِْ الخِير الِّي ما تِڨْدِرْ ترُدّه عِدَّه ... ياَ رُ وحْ رُوحِي ...
************************
زهرة الحواشي .
من ديوان * حديث الروح *
ليست هناك تعليقات:
إرسال تعليق