لا نجاملها/شريف بن محمود العرفاوى/جريدة الوجدان الثقافية

 لا نجاملها ولا نمدحها ولا نكافي بالعيب

لا نجاملها ولا نمدحها ولا نـــــــــكافي بالعيب

خلتني ربي يسامحها جرحي تـــــــــوا يطيب

خليها الدنيا تجرحها تتعلم من الدرس نصيب

لعلا الذكري تنفعها هالماضي مـــــــزال قريب

صغيرة مغروره يسترها هاي مشت تلقي الخير

تثبت في طبايع طبعتها تحب تولي شي كبير

طاش عقلها في وهرتها منظر فرجة فيه تحير

كتان حـــــــــــد ركبتها ينفخ فيه الريح يطير

لانجاملها ولا نمدحها ولا نكافــــــــــي بالعيب

خلتني ربي يسامحها جرحي تــــــــــوا يطيب

حبتها الدنيا هزتها رمتها فـــــــــــــي الابحار

هــــــــــــــــالموجة قوية قلبتها استر يا ستار

خبرها نسيت محبتها بين ليلة ونـــــــــــــــهار

مـــــــن عقلي نزعت مودتها توبة لا ثمة تكرار

اغصان تڨصت من شحرتها هكاكة حكمت الاقدار

كي تلڨمها مــــــــــــا تنفعها لا تنور وتجيب ثمار

لا نجاملها ولا نمدحها ولا نــــــــــكافي بالعيب

خلتني ربي يسامحها جرحي تـــــــــــوا يطيب

لا عاد الدنيا تردعها كيف مشات تلقي الخير

ضنيت الكلمة تسمعها خلتني شبت في الغير

حلفت معادش نشبحها نظري ليها صار قصير

نبتة من القلب نڨلعها بالحكمة وحسن التدبير

هذه ثمرة لا نزرعـــــها لا تصلح شتلة تشجير

سكومة بالك تجمعها تلم الخير الــــشي وفير

أرض الناس لا تفلحها تعبك يتســــــمي للغير

فكرة من راسك انزعها لا تخمم فكرك ويحير

لا نجاملها ولانمدحها ولانكافـــــــــــي بالعيب

خلتني ربي يسامحها جرحي تــــــــــوا يطيب

الامارة هاني موشمها علة ما يــداويها طبيب

الاسرار الكلة كاتمها نخاف لانـــــــزلق بالعيب

ارض والله لا نوطنها بلاد الظــن فــيها يخيب

وجايع كيفاش نسكنها يلزمها عالم وطـــبيب

خلــــــــيها الدنيا نجننها دور ومتلقاش حبيب

تلقاها ثقيلة مرزنها هالوقت قاسي وصــعيب

تضيع في أغوار مسربها من تشرق حتي لتغيب

لا نجاملها ولا نمدحها ولا نــــــــكافي بالعيب

خلتني ربي يسامحها جرحي تـــــــــوا يطيب

شريف بن محمود العرفاوى