( كداب ) :
كداب
كدب كدبة وصدقها
وعاش فيها كإن بجد
وعيش نفسه في الأوهام
وساق فيها وزاد الحد
ويوم عن يوم بيتمادى
وكدبه ف دمه بقى عاده
وصار نصاب فوق العاده
عشان مالقاش لا لوم ولا صد
بيتقن دوره ويمثل
ولا بينسى ولا يكسل
عشان يسبك اوي دوره
يعيد ويزيد ويسترسل
فضل ماشي ف طريق مغلوط
ولا بيسمع لأيها صوت
لا بيفرمل ولا بيرجع
كما إنسان رايح للموت
ويحلف كدب ألف يمين
وخاوى الجن والشياطين
وصدق نفسه واتورط
لحد ما يوم وقع في كمين
بدل ماهو حر صار محبوس
على الرجلين يوطي يبوس
بين المحابيس بيتذلل
بقى بينام مكان ما يدوس
ما اهو لو ماشي مشي سليم
وجيبه مافوهش ولا مليم
ولو كان هذب الأخلاق
وخلى تكاله ع الرزاق
ما كانش طاله سين ولا جيم
ما كانش طاله سين ولا جيم
بقلمي الشاعر جمال زكي عينر
ليست هناك تعليقات:
إرسال تعليق